پریتی زنٹا کو طلبہ احتجاج پر بیان دینا مہنگا پڑ گیا، سوشل میڈیا پر تنقید

نئی دہلی( شوبزڈیسک) بالی ووڈ کی معروف اداکارہ پریتی زنٹا کو نئی دہلی کے جنتر منتر پر جاری طلبہ احتجاج سے متعلق اپنی رائے کا اظہار کرنا مہنگا پڑ گیا، جس کے بعد سوشل میڈیا پر انہیں شدید تنقید کا سامنا کرنا پڑا۔پریتی زنٹا نے سماجی رابطے کی ویب سائٹ ایکس پر اپنی پوسٹ میں کہا کہ طلبہ کی حمایت کرنا اور ایسے تعلیمی اصلاحات کا مطالبہ کرنا ضروری ہے جو نوجوانوں کے مستقبل کے لیے بہتر ثابت ہوں، تاہم یہ بھی اہم ہے کہ پرامن طلبہ احتجاج کو کسی ایسے عناصر کے ہاتھوں استعمال نہ ہونے دیا جائے جو اسے انتشار پھیلانے یا اس کی اصل نوعیت تبدیل کرنے کے لیے استعمال کریں۔اداکارہ نے اپنی پوسٹ میں مزید لکھا کہ سوشل میڈیا پر پھیلنے والی نفرت دیکھ کر انہیں حیرت ہو رہی ہے اور سوال اٹھایا کہ کیا ملک کے اندر یا باہر موجود کچھ عناصر طلبہ کے غصے اور مایوسی کو اپنے مقاصد کے لیے استعمال کرنے کی کوشش کر رہے ہیں۔پریتی زنٹا کے بیان کے بعد سوشل میڈیا صارفین کی جانب سے مختلف ردعمل سامنے آئے۔ کچھ افراد نے ان کے مؤقف کی حمایت کی، جبکہ کئی صارفین نے احتجاج سے متعلق ان کی رائے پر تنقید بھی کی۔