اسلام آباد( ویب ڈیسک)پاکستان ٹیلی کمیونیکیشن اتھارٹی نے واٹس ایپ صارفین کے لیے اہم ہدایات جاری کرتے ہوئے خبردار کیا ہے کہ غیر فعال یا غیر رجسٹرڈ سم سے منسلک واٹس ایپ اکاؤنٹس متاثر ہو سکتے ہیں۔پی ٹی اے حکام کے مطابق بلاک یا غیر فعال سم سے منسلک واٹس ایپ اکاؤنٹس تک رسائی ختم ہونے کا امکان ہے، اس لیے صارفین کو اکاؤنٹ کے اچانک لاگ آؤٹ ہونے سے پہلے ضروری اقدامات کر لینے چاہییں۔اتھارٹی نے صارفین کو ہدایت کی ہے کہ وہ اپنے واٹس ایپ اکاؤنٹ کو فعال اور رجسٹرڈ سم کے ساتھ منسلک رکھیں اور فوری طور پر اس بات کی تصدیق کریں کہ ان کا واٹس ایپ نمبر فعال سم پر ہی چل رہا ہے۔پی ٹی اے کے مطابق جو صارفین غیر فعال سم استعمال کر رہے ہیں، وہ جلد از جلد فعال سم پر منتقل ہو جائیں، جبکہ ضرورت پڑنے پر قریبی فرنچائز یا کسٹمر سروس مرکز سے بھی رابطہ کیا جا سکتا ہے۔حکام نے مزید کہا کہ بائیومیٹرک تصدیق اور سم کی توثیق مکمل کروانا ضروری ہے تاکہ واٹس ایپ اکاؤنٹ، رابطوں اور ڈیجیٹل شناخت کو محفوظ رکھا جا سکے۔ ان کے مطابق موبائل نمبر صرف رابطے کا ذریعہ نہیں بلکہ صارف کی ڈیجیٹل شناخت کا بھی اہم حصہ ہے، اس لیے اس کے تحفظ کے لیے احتیاطی اقدامات ناگزیر ہیں۔
