باسیٹیر( سپورٹس ڈیسک) کیریبئن پریمیئر لیگ 2026 کے 18ویں میچ میں پاکستانی نوجوان بلے باز صائم ایوب کی دھواں دار سنچری کی بدولت جمیکا کنگز مین نے سینٹ کٹس اینڈ نیوس پیٹریاٹس کو 11 رنز سے شکست دے دی۔وارنر پارک میں کھیلے گئے میچ میں سینٹ کٹس اینڈ نیوس پیٹریاٹس نے ٹاس جیت کر جمیکا کنگز مین کو پہلے بیٹنگ کا موقع دیا۔ جمیکا کی ٹیم نے صائم ایوب کی جارحانہ بیٹنگ کے سہارے مقررہ 20 اوورز میں 7 وکٹوں پر 182 رنز بنائے۔صائم ایوب نے 58 گیندوں پر 102 رنز کی شاندار اننگز کھیلی، جس میں 6 چوکے اور 8 چھکے شامل تھے۔ انہوں نے آغاز ہی سے جارحانہ انداز اپنایا اور میدان کے چاروں اطراف دلکش اسٹروکس کھیلے۔کیمو پال نے بھی آخری مرحلے میں 13 گیندوں پر 25 رنز بنا کر ٹیم کے مجموعے میں قیمتی اضافہ کیا۔ سینٹ کٹس کی جانب سے ونیندو ہسرنگا اور پاکستانی فاسٹ بولر نسیم شاہ نے 2،2 وکٹیں حاصل کیں۔183 رنز کے ہدف کے تعاقب میں سینٹ کٹس کی ٹیم 20 اوورز میں 6 وکٹوں پر 171 رنز بناسکی۔ آندرے فلیچر نے 38 گیندوں پر 55 جبکہ داسن شناکا نے 18 گیندوں پر 35 رنز بنائے، تاہم وہ ٹیم کو فتح نہ دلاسکے۔جمیکا کنگز مین کی جانب سے حنین شاہ اور جیدیہ بلیڈز نے 2،2 وکٹیں حاصل کیں، جبکہ صائم ایوب اور کیمو پال نے ایک، ایک کھلاڑی کو آؤٹ کیا۔شاندار سنچری اور مجموعی کارکردگی پر صائم ایوب کو میچ کا بہترین کھلاڑی قرار دیا گیا۔
